آسٹریلیوی شہری نے پالتو کتے کیلئے چیٹ جی پی ٹی کی مدد سے ویکسین بنا لی

سڈنی: آسٹریلیا میں مشین لرننگ کے ایک ماہر پال کوننگھم نے جدید ٹیکنالوجی کا استعمال کرتے ہوئے اپنے پالتو کتے ‘روزی’ کی زندگی بچانے کے لیے ایک ذاتی نوعیت کی ایم آر این اے (mRNA) کینسر ویکسین تیار کر کے دنیا کو حیران کر دیا ہے۔ روزی نامی کتے کو 2024 میں جلد کے کینسر (Mastocytoma) کی تشخیص ہوئی تھی اور ڈاکٹروں نے اسے محض چند ماہ کا وقت دیا تھا۔

پال کوننگھم نے اپنے 17 سالہ پیشہ ورانہ تجربے اور مصنوعی ذہانت کے ٹولز ‘چیٹ جی پی ٹی’ اور گوگل ڈیپ مائنڈ کے ‘ایلفا فولڈ’ (AlphaFold) کا سہارا لیا۔ چیٹ جی پی ٹی نے انہیں جینومک سیکوینسنگ اور امیونوتھراپی کا مکمل لائحہ عمل فراہم کیا، جبکہ ایلفا فولڈ نے کینسر زدہ پروٹینز کی تھری ڈی ساخت کا تجزیہ کرنے میں مدد دی۔ اس ڈیٹا کی بنیاد پر پال نے اپنے ذاتی الگورتھمز کے ذریعے مخصوص ‘ٹارگٹس’ منتخب کیے اور یونیورسٹی آف نیو ساؤتھ ویلز کے تعاون سے دو ماہ کے اندر ویکسین تیار کر لی۔

دسمبر 2025 سے مارچ 2026 تک ویکسین کی تین خوراکیں دینے کے بعد روزی کی صحت میں نمایاں بہتری آئی ہے اور ایک ٹیومر کا سائز تقریباً آدھا رہ گیا ہے۔ اگرچہ ایک دوسرا ٹیومر تاحال مزاحمت کر رہا ہے جس پر مزید تحقیق جاری ہے، تاہم سائنسدان اس کوشش کو ‘پرسنلائزڈ میڈیسن’ کی سمت میں ایک سنگ میل قرار دے رہے ہیں۔ ماہرین کا کہنا ہے کہ یہ تجربہ ثابت کرتا ہے کہ اے آئی کی مدد سے مستقبل میں کینسر جیسی بیماریوں کا علاج تیزی سے اور کم لاگت میں ممکن ہو سکے گا۔