پشاور: خیبر پولو فیسٹیول 2026 کا میلہ اختتام پذیر

پشاور: پشاور میں خیبر پولو فیسٹیول 2026 کا پہلا ایڈیشن تمام تر رعنائیوں اور جوش و خروش کے ساتھ اختتام پذیر ہو گیا۔ فیسٹیول کا فائنل میچ پولو کے روایتی حریفوں چترال اور گلگت بلتستان کی ٹیموں کے درمیان کھیلا گیا، جہاں سنسنی خیز مقابلے کے بعد گلگت بلتستان کی ٹیم نے عمدہ کھیل کا مظاہرہ کرتے ہوئے فتح اپنے نام کر لی۔

فائنل میچ کے مہمانِ خصوصی کور کمانڈر پشاور تھے۔ اس موقع پر خیبر پختونخوا اور گلگت بلتستان کے مختلف علاقوں سے ہزاروں کی تعداد میں شائقین نے شرکت کی اور میچ سے بھرپور لطف اٹھایا۔

فیسٹیول کے دوران ثقافتی رنگ نمایاں رہے۔ چترالی ڈانس، روایتی لوک رقص اور میوزیکل پرفارمنس نے حاضرین کو خوب محظوظ کیا، جبکہ نیزہ بازی کے روایتی کھیل کا شاندار مظاہرہ بھی پیش کیا گیا۔ حسبِ روایت پاک آرمی کے اسپیشل سروسز گروپ (ایس ایس جی) کے جوانوں نے فری فال جمپس کا دلکش مظاہرہ کیا۔ اس کے علاوہ خیبر پختونخوا کے مختلف علاقوں کے روایتی رقص بھی پیش کیے گئے جنہیں شرکاء نے بے حد سراہا۔