خیبرپختونخوا حکومت کے ساتھ چلنے کی کوشش کی، ایمرجنسی مجبوراً لگانا پڑی: وزیراعظم

وزیراعظم محمد شہباز شریف نے پارلیمانی پارٹی کے اجلاس سے خطاب کرتے ہوئے کہا ہے کہ وفاقی حکومت نے خیبرپختونخوا حکومت کو ساتھ لے کر چلنے کی ہر ممکن کوشش کی، تاہم امن و امان کی نازک صورتحال کے باعث ایمرجنسی کا نفاذ مجبوری میں کرنا پڑا۔ انہوں نے کے پی کے بہادر عوام اور سیکیورٹی فورسز کی قربانیوں کا اعتراف کرتے ہوئے کہا کہ صوبے میں شہریوں اور اہلکاروں کی شہادتیں انتہائی افسوسناک ہیں۔ ماضی کا حوالہ دیتے ہوئے وزیراعظم نے کہا کہ گزشتہ ڈھائی برس کے دوران دھرنوں اور لانگ مارچ کی سیاست نے ملکی معیشت کو نقصان پہنچایا اور اسلام آباد کے ڈی چوک میں جو مناظر دیکھے گئے وہ سب کے سامنے ہیں۔ شہباز شریف نے عزم ظاہر کیا کہ حکومت خیبرپختونخوا سے دہشت گردی اور بے روزگاری کا خاتمہ کرے گی اور عملی اقدامات کے ذریعے صوبے کو امن و ترقی کی راہ پر گامزن کرے گی۔