فیصل واوڈا کے بیانات کو زیادہ سنجیدگی سے نہیں لینا چاہیے: رانا ثنا اللہ

مشیرِ وزیراعظم برائے سیاسی امور رانا ثناء اللہ نے سینیٹر فیصل واوڈا کی حالیہ پریس کانفرنس پر ردِعمل دیتے ہوئے کہا ہے کہ فیصل واوڈا اس نوعیت کی گفتگو کرتے رہتے ہیں، لہٰذا ان کے بیانات کو زیادہ سنجیدگی سے نہیں لینا چاہیے۔ پارلیمنٹ ہاؤس کے باہر میڈیا سے گفتگو کرتے ہوئے رانا ثناء اللہ نے خیبرپختونخوا کی مجموعی صورتحال پر امید کا اظہار کیا کہ ان شاء اللہ صوبے میں امن و امان کے حالات جلد بہتر ہوں گے اور دہشت گردی کے مکمل خاتمے کے بعد پاکستان ترقی کی راہ پر مزید آگے بڑھے گا۔ 12 اکتوبر 1999 کے فوجی اقدام کا ذکر کرتے ہوئے ان کا کہنا تھا کہ اس روز آئین معطل کر کے مارشل لا لگایا گیا تھا اور پارلیمنٹ اِس کا جائزہ لے رہی ہے، تاہم موجودہ سیاسی و آئینی اقدامات کو 12 اکتوبر 1999 کے واقعات سے ملانا بالکل نامناسب اور غیر معقول ہے۔