ہانگ کانگ سکسز کیلئے پاکستانی ٹیم کا اعلان، عباس آفریدی کپتان برقرار

ہانگ کانگ سکسز ٹورنامنٹ کے لیے پاکستان کرکٹ ٹیم کا اعلان کر دیا گیا ہے جس کی قیادت آل راؤنڈر عباس آفریدی کریں گے۔ یہ تین روزہ ایونٹ رواں سال 30 اکتوبر سے یکم نومبر تک کھیلا جائے گا، جس میں مجموعی طور پر 12 ٹیمیں حصہ لیں گی جنہیں چار گروپس میں تقسیم کیا گیا ہے۔ پاکستان کی ٹیم کو گروپ سی میں رکھا گیا ہے جبکہ رضا کچلو ٹیم کے مینیجر کے فرائض انجام دیں گے۔ پاکستانی اسکواڈ میں کپتان عباس آفریدی کے علاوہ عبدالصمد، احمد دانیال، محمد عرفان خان، خواجہ نافع، محمد شہزاد اور سعد مسعود شامل ہیں۔ قومی سکواڈ ٹورنامنٹ میں شرکت کے لیے 28 اکتوبر کو ہانگ کانگ کے لیے روانہ ہوگا۔