سابق قومی کرکٹرز کا بنگلا دیش کرکٹ بورڈ کے ٹیم بھارت نہ بھیجنے کے فیصلے کا خیرمقدم

سابق پاکستانی کرکٹرز نے بنگلا دیش کرکٹ بورڈ کی جانب سے اپنی قومی ٹیم کو بھارت نہ بھیجنے کے فیصلے کا خیرمقدم کرتے ہوئے اس اقدام کو درست قرار دیا ہے۔

سابق ٹیسٹ کرکٹر توصیف احمد نے کہا ہے کہ آئی سی سی کو چاہیے کہ بنگلا دیش کے بھارت کے خلاف میچز کسی دوسرے ملک منتقل کرے، اگر ایسا ممکن نہ ہو تو بنگلا دیش کو ایونٹ سے واک آؤٹ کر جانا چاہیے۔

سابق ٹیسٹ کرکٹر شعیب محمد نے کہا کہ بھارت نے جو بیج بویا تھا، اب وہی کاٹ رہا ہے۔ ان کا کہنا تھا کہ آئی سی سی کو اس حقیقت پر سنجیدگی سے غور کرنا ہوگا کہ اب کئی ٹیمیں بھارت جا کر کھیلنے کے لیے تیار نہیں۔ انہوں نے الزام عائد کیا کہ بھارت نے ماضی میں پاکستان کے خلاف سازشیں کیں۔

سابق ٹیسٹ کرکٹر محمد عرفان نے کہا کہ بھارت نے ایشیا کپ کے دوران کرکٹ کو داغ دار کرنے کی کوشش کی۔ انہوں نے مطالبہ کیا کہ آئی سی سی کو کرکٹ میں سیاست کی مداخلت روکنی چاہیے۔

سابق پاکستانی کرکٹر عبدالرؤف کا کہنا تھا کہ بھارتی کرکٹ بورڈ پر بی جے پی کا اثر و رسوخ ہے اور بورڈ نے دقیانوسی ذہنیت کے تحت بنگلا دیش کے فاسٹ بولر مستفیض الرحمان کو آئی پی ایل سے باہر کیا۔

سابق کرکٹرز نے اس بات پر زور دیا کہ عالمی کرکٹ میں برابری، غیر جانبداری اور کھیل کے اصولوں کو ہر صورت یقینی بنایا جانا چاہیے۔