بچوں کو محفوظ رکھنے کیلئے مصنوعی ذہانت کو بے لگام نہیں چھوڑا جاسکتا: فرانسیسی صدر

فرانس کے صدر ایمانوئل میکرون نے زور دیا ہے کہ مصنوعی ذہانت (AI) کے ایسے استعمال پر مکمل پابندی عائد کی جانی چاہیے جو بچوں کی ذہنی صحت یا دماغی نشوونما کے لیے خطرہ بنے۔ پیرس میں دیے گئے ایک انٹرویو کے دوران فرانسیسی صدر نے کہا کہ مصنوعی ذہانت کو بے لگام نہیں چھوڑا جا سکتا اور بچوں کو اس کے منفی اثرات سے محفوظ رکھنا ازحد ضروری ہے۔ انہوں نے 15 سال سے کم عمر بچوں کے لیے مخصوص سوشل میڈیا پلیٹ فارمز پر پابندی کی تجویز کو دہراتے ہوئے واضح کیا کہ اے آئی کمپنیوں کو اپنی ٹیکنالوجی کی آزادانہ اور پیشگی سرٹیفکیشن قبول کرنا ہوگی۔ میکرون کے مطابق اوپن اے آئی اور اینتھروپک سمیت بڑی ٹیکنالوجی کمپنیاں مجوزہ چارٹر میں شامل ہوں گی، جبکہ یورپ اے آئی کے ضابطہ کار کی قیادت کرتے ہوئے امریکہ اور کینیڈا جیسے ممالک کو بھی مشترکہ قانون سازی پر آمادہ کرے گا۔