ایلومینیم سے طویل عمر والی بیٹری تیار کرنے کی راہ ہموار

چائنیز اکیڈمی آف سائنسز کے محققین نے ایلومینیم پر مبنی ایک نیا کیٹالسٹ تیار کیا ہے جو سوڈیم سلفر بیٹریوں کی کارکردگی اور عمر کو نمایاں طور پر بہتر بنانے کی صلاحیت رکھتا ہے۔ بیٹریوں میں سوڈیم پولی سلفائیڈز کے کیتھوڈ سے اخراج اور کارکردگی میں کمی کے دیرینہ مسئلے کو حل کرنے کے لیے تحقیقی ٹیم نے ایلومینیم کی ایٹمی ساخت میں آکسیجن کی جگہ نائٹروجن کا ایک ایٹم شامل کر کے ‘Al–O3N’ نامی نئی ساخت بنائی، جس سے ایلومینیم اور سلفر کا باہمی تعامل اور کیمیائی استحکام مستحکم ہوا۔ لیبارٹری تجربات کے دوران اس بیٹری نے 2,500 چارج و ڈسچارج سائیکلز مکمل کیے جبکہ ہر سائیکل میں کارکردگی کا زوال محض 0.017 فیصد ریکارڈ کیا گیا۔ ماہرین کا کہنا ہے کہ اس سستی اور وافر مقدار میں دستیاب دھات کے استعمال سے مہنگی دھاتوں پر انحصار کم کرنے اور طویل العمر توانائی کے حصول میں بڑی مدد ملے گی۔