4 سالہ دور حکومت میں منصوبے مکمل کیوں نہیں کئے؟ عظمیٰ بخاری کا فواد چوہدری کو جواب

وزیر اطلاعات پنجاب عظمیٰ بخاری نے فواد چوہدری کے بیان پر ردِعمل دیتے ہوئے کہا ہے کہ منصوبے صرف سوچنے سے کسی کے نہیں ہو جاتے، بلکہ جو منصوبہ شروع کر کے اسے مکمل کرتا ہے، اصل میں منصوبہ اسی کا ہوتا ہے۔ انہوں نے سوال اٹھایا کہ اگر یہ ترقیاتی منصوبے تحریک انصاف کے ہی تھے تو اپنے 4 سالہ دورِ حکومت میں انہیں مکمل کیوں نہ کیا گیا؟ عظمیٰ بخاری کا کہنا تھا کہ پی ٹی آئی کے اصل اور معروف منصوبے تو انڈے، کٹے، مرغیاں اور بھنگ کی فیکٹریاں ہی تھے۔ انہوں نے مزید کہا کہ وفاقی و صوبائی حکومتیں پاس ہونے کے باوجود ساڑھے 6 سال بعد ان منصوبوں کا کریڈٹ لینے کی کوشش کرنا صرف شرمندگی کا باعث ہے، جبکہ انہوں نے طنزاً فواد چوہدری سے پوچھا کہ وہ سچ بتائیں کہ وزیراعلیٰ پنجاب کا استقبال کیسا تھا۔