سائنس دانوں نے 2 حلقوں پر مشتمل سیاروی ملبے والا سفید بونا ستارہ دریافت کر لیا

ماہرینِ فلکیات نے ملکی وے کہکشاں میں ‘J13281450’ نامی ایک ایسا نایاب سفید بونا (وائٹ ڈوارف) ستارہ دریافت کیا ہے جس کے گرد سیاروی ملبہ دو الگ الگ حلقوں (ڈسکس) کی شکل میں گردش کر رہا ہے۔ سائنسی جریدے ‘نیچر آسٹرونومی’ میں شائع ہونے والی اس تحقیق کے مطابق یہ ستارہ برجِ سنبلہ میں زمین سے 1600 نوری سال کی دوری پر واقع ہے، اور اس کا مشاہدہ چلی میں قائم ‘ویری لارج ٹیلی اسکوپ’ سے کیا گیا ہے۔ یونیورسٹی آف چلی کے ماہرِ فلکیات فیلپے لاگوس ویلیچس کا کہنا ہے کہ اس سے قبل دریافت ہونے والے 21 سفید بونا ستاروں کے گرد صرف ایک حلقہ دیکھا گیا تھا، تاہم دو حلقوں پر مشتمل یہ پیچیدہ ساخت اس بات کو سمجھنے میں مدد دے گی کہ اربوں سال بعد جب ہمارا سورج ایندھن ختم ہونے پر ایک انتہائی کثیف سفید بونے ستارے میں تبدیل ہوگا، تو ہمارے نظامِ شمسی اور اس کے سیاروں کی کیا صورتِ حال ہوگی۔