اداکارہ ایمن سلیم نے پیپلز پارٹی جوائن کرلی

معروف اداکارہ اور سابق قومی کرکٹر سلیم یوسف کی صاحبزادی ایمن سلیم نے باقاعدہ سیاست میں قدم رکھتے ہوئے پاکستان پیپلز پارٹی (PPP) میں شمولیت کا اعلان کر دیا ہے۔

سوشل میڈیا پر وائرل ہونے والی ایک ویڈیو میں ایمن سلیم کو ایک تقریب کے دوران پیپلز پارٹی میں شامل ہونے کا باضابطہ اعلان کرتے ہوئے دیکھا جا سکتا ہے۔ اس موقع پر گفتگو کرتے ہوئے اداکارہ نے کہا کہ وہ بچپن ہی سے سابق وزیراعظم شہید محترمہ بے نظیر بھٹو کی بہت بڑی مداح رہی ہیں۔ ان کا ماننا ہے کہ جس لڑکی نے بھی محترمہ کی زندگی اور جدوجہد کو دیکھا ہے، وہ ان سے لازمی متاثر ہوئی ہے۔

ایمن سلیم کا کہنا تھا کہ پیپلز پارٹی کا حصہ بننا ان کے لیے انتہائی خوشی اور فخر کا باعث ہے۔ انہوں نے وضاحت کی کہ یہ ان کے لیے محض ایک روایتی سیاسی فیصلہ نہیں بلکہ ایک پکا وعدہ ہے جو وہ اپنے ملک اور قوم سے کرنے جا رہی ہیں۔ انہوں نے عزم ظاہر کیا کہ وہ اس سیاسی پلیٹ فارم کے ذریعے سچی اور نیک نیت کے ساتھ پاکستان اور اس کے عوام کے لیے خدمت کریں گی۔