الیکشن کمیشن کا انتخابی عمل میں اے آئی کا باقاعدہ استعمال کرنے کا فیصلہ

الیکشن کمیشن آف پاکستان نے انتخابی عمل میں مصنوعی ذہانت (AI) کے باقاعدہ استعمال اور اس کے غلط استعمال کو روکنے کے لیے ضابطہ اخلاق میں اہم ترامیم کا فیصلہ کرتے ہوئے سیاسی جماعتوں، میڈیا اور عوام سے 20 نومبر تک تجاویز طلب کر لی ہیں۔ مجوزہ ترامیم کے تحت سیاسی جماعتوں، امیدواروں اور میڈیا کے لیے ڈیپ فیک، مصنوعی آواز، آڈیو یا ویڈیو جیسے AI سے تیار کردہ مواد پر واضح لیبل لگانا لازمی ہو گا، جبکہ ووٹرز کو دھوکا دینے، ججز، الیکشن حکام اور مسلح افواج کے خلاف جعلی مواد یا روبو کالز بنانے پر مکمل پابندی عائد ہو گی۔ اس کے علاوہ سوشل میڈیا پر آٹومیٹڈ بوٹس کے ذریعے جعلی ٹرینڈز بنانے کی ممانعت ہو گی، اور پیمرا، SMPRA و NCCIA بغیر لیبل کے جاری ہونے والے AI مواد کی مانیٹرنگ کر کے الیکشن کمیشن کو رپورٹ بھجوانے کے پابند ہوں گے۔