فیلڈ مارشل کی تجویز پر ایران چار ملکی اجلاس کی میزبانی کر رہا ہے: اسماعیل بقائی

ایرانی وزارتِ خارجہ کے ترجمان اسماعیل بقائی نے تصدیق کی ہے کہ ایران آج پاکستان، ترکیہ اور سعودی عرب کے سینئر حکام کی میزبانی کر رہا ہے اور یہ چار ملکی اجلاس پاک فوج کے سپہ سالار فیلڈ مارشل عاصم منیر کی تجویز اور پیشکش پر منعقد کیا جا رہا ہے۔ پریس بریفنگ کے دوران انہوں نے بتایا کہ اجلاس میں فلسطین، لبنان اور خطے کی مجموعی سیکیورٹی صورتِ حال کے ساتھ ساتھ اسرائیل کے توسیع پسندانہ منصوبوں پر بات ہو گی۔ ترجمان کا کہنا تھا کہ خطے کے ممالک کے درمیان اعتماد کا قیام وقت کی اہم ضرورت ہے اور ایران ملکی سلامتی کے لیے اپنے دفاع کے حق سے پیچھے نہیں ہٹے گا۔ انہوں نے مزید کہا کہ تہران پہنچنے والا قطری وفد بھی اس صورتِ حال میں مصالحتی کردار ادا کر رہا ہے۔