ندیم نانی والا کی بہن کو پروٹوکول دینا اور چھوڑنا پولیس کو مہنگا پڑگیا

پولیس کو مشہور ٹک ٹاکر ندیم نانی والا کی بہن اور ٹک ٹاکر سامیہ مبارک کو مبینہ طور پر پروٹوکول دینے اور گرفتاری کے بعد چھوڑنا مہنگا پڑ گیا ہے، جس پر سخت انتظامی کارروائی عمل میں لائی گئی ہے۔

ذرائع کے مطابق سامیہ مبارک کو بغیر نمبر پلیٹ والی گاڑی پر روکے جانے کے بعد مبینہ طور پر پروٹوکول دینے اور پیسے لے کر ملزمان کو چھوڑنے کے معاملات سامنے آئے تھے۔ ڈی آئی جی آپریشنز کے احکامات پر کارروائی کرتے ہوئے ڈیفنس بی پولیس کے ایس ایچ او، محرر اور ایک لیڈی کانسٹیبل کو ان کے عہدوں سے ہٹا دیا گیا ہے۔

پولیس حکام کا کہنا ہے کہ متعلقہ اہلکاروں پر اختیارات سے تجاوز اور سنگین الزامات عائد کیے گئے ہیں۔ شفاف انکوائری کو یقینی بنانے کی خاطر تینوں اہلکاروں کو عہدوں سے ہٹا کر معاملے کی مکمل تحقیقات ایس ایس پی آپریشنز کے سپرد کر دی گئی ہیں۔ ڈی آئی جی آپریشنز نے واضح کیا ہے کہ انکوائری رپورٹ میں الزامات ثابت ہونے کی صورت میں ملوث اہلکاروں کے خلاف سخت محکمانہ کارروائی کی جائے گی۔