ٹرمپ کی اسرائیلی عوام سے جنگی مجرم نیتن یاہو کو ووٹ دینے کی اپیل

امریکی صدر ڈونلڈ ٹرمپ نے اسرائیل میں 27 اکتوبر کو ہونے والے پارلیمانی انتخابات سے قبل ایک بار پھر اسرائیلی وزیرِ اعظم بنیامین نیتن یاہو کی کھل کر حمایت کا اعلان کرتے ہوئے اسرائیلی ووٹرز پر زور دیا ہے کہ وہ نیتن یاہو کو دوبارہ منتخب کریں تاکہ مل کر شروع کیے گئے کاموں کو مکمل کیا جا سکے۔

ٹرمپ نے اپنے سوشل میڈیا پلیٹ فارم ‘ٹروتھ سوشل’ (Truth Social) پر جاری کردہ پیغام میں نیتن یاہو کی حمایت میں کیا گیا اپنا بیان دوبارہ شیئر کیا۔ انہوں نے دعویٰ کیا کہ ان کے اور نیتن یاہو کے درمیان بہترین تعلقات ہیں اور دونوں نے متعدد اہم عسکری معرکوں میں کامیابی حاصل کی ہے۔ ٹرمپ نے وینزویلا کے خلاف امریکی کارروائیوں کا حوالہ دیا اور دعویٰ کیا کہ امریکا اور اسرائیل نے مشترکہ ‘آپریشن مڈنائٹ ہیمر’ کے ذریعے ایران کو ایٹمی ہتھیار حاصل کرنے سے روکا تھا، جبکہ ‘آپریشن ایپک فیوری’ کے بعد ایران کی بحریہ، فضائیہ اور معیشت مفلوج ہو کر رہ گئی ہیں۔

امریکی صدر نے مزید دعویٰ کیا کہ ایران میں افراطِ زر (مہنگائی) کی شرح 301 فیصد تک پہنچ چکی ہے اور بحری محاصرے کے باعث اس کی تیل کی برآمدات شدید متاثر ہوئی ہیں۔ ٹرمپ کا کہنا تھا کہ نیتن یاہو جنگی حالات کے لیے ایک غیر معمولی قائد ہیں اور ان کی قیادت میں ابخطے سے ‘امریکا مردہ باد’ اور ‘اسرائیل مردہ باد’ کے نعرے ختم ہو چکے ہیں۔ ایک ہفتے کے دوران نیتن یاہو کے حق میں جاری اپنے اس دوسرے عوامی حمایت نامے کے اختتام پر ٹرمپ نے اسرائیلی عوام سے اپیل کی کہ وہ نیتن یاہو کو ہی اپنا اگلا وزیرِ اعظم منتخب کریں۔