سعودی عرب اور یونان کا محفوظ بحری راستوں، توانائی کے شعبے میں تعاون بڑھانے پر اتفاق

سعودی عرب اور یونان نے بین الاقوامی بحری راستوں کے تحفظ اور عالمی منڈیوں کو توانائی کی بلا تعطل فراہمی یقینی بنانے کے لیے باہمی تعاون کو فروغ دینے پر اتفاق کیا ہے।

سعودی دارالحکومت ریاض کے قصرِ الیمامہ میں سعودی ولی عہد و وزیرِ اعظم شہزادہ محمد بن سلمان اور یونان کے وزیرِ اعظم کیریاکوس میتسوتاکس کے درمیان اعلیٰ سطح پر اہم ملاقات ہوئی۔ مذاکرات کے دوران دونوں رہنماؤں نے بحری راستوں کی سلامتی، علاقائی پائیداری اور توانائی کے بنیادی ڈھانچے پر ہونے والے حالیہ حملوں اور عالمی معیشت پر ان کے منفی اثرات پر گہری تشویش کا اظہار کیا۔

ملاقات کے بعد جاری کردہ مشترکہ اعلامیے کے مطابق یونان نے عالمی تیل منڈی میں استحکام برقرار رکھنے اور ایسٹ ویسٹ پائپ لائن جیسے متبادل برآمدی راستوں کے ذریعے توانائی کی فراہمی جاری رکھنے کی سعودی کوششوں کی تعریف کی۔ دونوں ممالک نے دفاع، سلامتی، انسدادِ دہشت گردی، سائبر سیکیورٹی اور انٹیلی جنس معلومات کے تبادلے سمیت مصنوعی ذہانت، خلائی ٹیکنالوجی، صحت، تعلیم، سیاحت اور ماحولیات کے شعبوں میں مشترکہ منصوبے آگے بڑھانے کے عزم کا اعادہ کیا۔