فلمی ادارے میں احتجاج پر نصیرالدین شاہ کی حمایت، بی جے پی کا تحقیقات کا مطالبہ

بھارتی اداکار نصیرالدین شاہ کی جانب سے کولکتہ کے تاریخی ‘ستیہ جیت رے فلم اینڈ ٹیلی ویژن انسٹی ٹیوٹ’ (SRFTI) کے احتجاجی طلبہ کی حمایت کے بعد ایک نیا اور شدید سیاسی تنازع کھڑا ہو گیا ہے۔

نصیرالدین شاہ نے سوشل میڈیا پر ایک ویڈیو پیغام میں الزام عائد کیا کہ بھارتیہ جنتا پارٹی (BJP) اپوزیشن کے نظریات رکھنے والوں سے سیاسی انتقام لے رہی ہے اور مستقبل کے فلم سازوں کو خوفزدہ کر کے اپنے سانچے میں ڈھالنا چاہتی ہے۔ اس بیان پر بی جے پی کے رکنِ پارلیمنٹ اور ترجمان راہول سنہا نے اداکار کی تحقیقات کا مطالبہ کرتے ہوئے ان کے بیانات کو ایک “بین الاقوامی سازش” کا حصہ قرار دیا۔ ادھر بین الاقوامی شہرت یافتہ فلم ساز پائل کپاڈیا نے بھی طلبہ پر کی جانے والی تادیبی کارروائیوں کی مذمت کرتے ہوئے ان کی حمایت کی ہے۔

وزارتِ اطلاعات و نشریات کے زیرِ اہتمام چلنے والے اس ادارے کی رپورٹ کے مطابق، کیمپس میں کشیدگی کا آغاز 27 ستمبر کو ہوا جو بعد میں توڑ پھوڑ، وائس چانسلر کے دفتر کے گھیراؤ اور پتھراؤ تک جا پہنچی۔ انتظامیہ نے کیمپس میں سی سی ٹی سی کیمروں کی تنصیب اور سیکیورٹی اقدامات پر احتجاج کرنے والے 6 طلبہ کو ایک سال کے لیے خارج کر دیا ہے جبکہ حالات کو معمول پر لانے کے لیے تمام کلاسز 13 نومبر تک معطل کر دی گئی ہیں۔