تین ملکی ٹورنامنٹ: انگلینڈ کیخلاف کامیابی پر محسن نقوی کی قومی ہیروز کو مبارکباد

تین ملکی ون ڈے ٹورنامنٹ میں انگلینڈ کے خلاف سنسنی خیز اور غیر معمولی کامیابی کے بعد چیئرمین پاکستان کرکٹ بورڈ (پی سی بی) محسن نقوی قومی ٹیم کے کھلاڑیوں کو مبارکباد دینے خود گراؤنڈ میں پہنچ گئے۔

چیئرمین پی سی بی محسن نقوی کے ہمراہ وفاقی وزراء عطا تارڑ اور عون چوہدری بھی موجود تھے۔ تینوں شخصیات نے انگلینڈ کے خلاف شاندار اور تاریخی کارکردگی کا مظاہرہ کرنے والے قومی ہیروز سے فرداً فرداً ملاقات کی اور جیت پر مبارکباد پیش کی۔ اس موقع پر چیئرمین پی سی بی محسن نقوی نے میچ کے حقیقی ہیروز حارث رؤف اور شاداب خان سے خصوصی ملاقات کی اور انہیں گلے لگا کر ان کی بہترین کھیل کی تعریف کی۔

واضح رہے کہ قذافی اسٹیڈیم لاہور میں کھیلے گئے انتہائی حساس اور اہم میچ میں پاکستان نے انگلینڈ کو 1 وکٹ سے شکست دے کر ٹرائی سیریز کے فائنل میں اپنی جگہ پکی کر لی۔ میچ میں شاداب خان اور حارث رؤف نے دباؤ کے باوجود ذمہ دارانہ بیٹنگ کرتے ہوئے 89 رنز کی ناقابلِ شکست اور تاریخی شراکت داری قائم کی، جس نے قومی ٹیم کی جیت میں کلیدی کردار ادا کیا۔