سانگھڑ میں کتے بھی پیچھے رہ گئے، انسان نے 4 افراد کو کاٹ لیا

سندھ کے شہر سانگھڑ میں ایک انتہائی غیر معمولی اور حیران کن واقعہ پیش آیا ہے جہاں ایک نامعلوم شخص نے نجی بینک کے باہر کھڑے شہریوں پر اچانک حملہ کرکے چار افراد کو دانتوں سے کاٹ کر زخمی کر دیا اور موقع سے فرار ہونے میں کامیاب ہو گیا۔ واقعے میں زخمی ہونے والے دو افراد کی شناخت سانول یونس اور یاسین انور کے نام سے ہوئی ہے جبکہ دیگر دو کی شناخت تاحال سامنے نہیں آ سکی۔ واقعے کی سی سی ٹی وی فوٹیج بھی حاصل کر لی گئی ہے جس نے شہریوں کو شدید حیرت میں مبتلا کر دیا ہے۔ واضح رہے کہ شہر میں آوارہ کتوں کے کاٹنے کے واقعات تو عام طور پر تشویش کا باعث بنتے ہیں، تاہم انسان کی جانب سے شہریوں کو کاٹنے کے اس انوکھے واقعے نے علاقے میں نئی بحث چھڑ دی ہے۔