صارفین کیلئے اچھی خبر، ایل پی جی 50 روپے فی کلو سستی ہونے کا امکان

مہنگی ایل پی جی (LPG) خریدنے والے صارفین کے لیے بڑی راحت کی خبر سامنے آئی ہے؛ آئندہ ایک سے دو روز کے دوران ایل پی جی کی فی کلو قیمت میں 50 روپے تک بڑی کمی کا قوی امکان ہے۔

ایف پی سی سی آئی (FPCCI) ایل پی جی اسٹینڈنگ کمیٹی کے کنوینئر علی حیدر کے مطابق 16 اکتوبر تک لوڈ کیے گئے ایرانی ایل پی جی باؤزرز کو پاکستان میں داخلے کی اجازت مل گئی ہے۔ تقریباً 900 باؤزرز کی آمد سے ملک بھر میں ایل پی جی کی فراہمی میں نمایاں بہتری آئے گی، جس کے بعد اگلے 24 گھنٹوں میں ہی قیمتوں میں کمی کا سلسلہ شروع ہو جائے گا۔ انہوں نے بتایا کہ اکتوبر کے دوران پاکستان نے 5 جہازوں کے ذریعے 22 ہزار ٹن ایل پی جی درآمد کی ہے۔

علی حیدر کا مزید کہنا تھا کہ پاکستان میں ایل پی جی کی مجموعی یومیہ طلب 12 سے 13 ہزار ٹن ہے، جبکہ صرف کراچی میں روزانہ 4 سے 5 ہزار ٹن ایل پی جی استعمال ہوتی ہے، جس کا 40 فیصد کمرشل اور 30 فیصد صنعتی شعبے پر مشتمل ہے۔ انہوں نے اوگرا (OGRA) کے قیمتوں کے تعین سے متعلق فارمولے کو غیر مناسب قرار دیتے ہوئے مطالبہ کیا کہ ایل پی جی کی قیمتوں کا تعین ماہانہ کے بجائے ہفتہ وار بنیادوں پر کیا جائے۔