خیبرپختونخوا میں ترقیاتی کاموں کیلئے وفاق 160 ارب روپے فراہم کرے گا:شہباز شریف

وزیراعظم شہباز شریف نے اعلان کیا ہے کہ وفاقی حکومت خیبرپختونخوا میں جاری ترقیاتی منصوبوں کی تکمیل اور سیکیورٹی کو فول پروف بنانے کے لیے 160 ارب روپے فراہم کرے گی، جبکہ دہشت گردی کے خلاف جنگ اور پولیس کی استعداد کار میں اضافے کے لیے تمام درکار وسائل فراہم کیے جائیں گے۔

پشاور میں قبائلی اضلاع کے نمائندوں پر مشتمل ترقیاتی کونسل اور قبائلی مشران کا ایک اعلیٰ سطحی اجلاس منعقد ہوا، جس میں وزیراعظم شہباز شریف کے ساتھ آرمی چیف فیلڈ مارشل سید عاصم منیر نے بھی شرکت کی۔ اجلاس سے خطاب کرتے ہوئے وزیراعظم نے قبائلی عوام اور شہدا کی قربانیوں کو خراجِ تحسین پیش کیا اور اعلان کیا کہ 40 منتخب ارکان پر مشتمل قبائلی کونسل کو مکمل طور پر بااختیار بنایا جائے گا۔

وزیراعظم نے صوبے میں ماضی کی بدعنوانی اور ناکامیوں کا ذکر کرتے ہوئے کہا کہ خیبرپختونخوا میں گزشتہ 13 سال سے سیکیورٹی اور پولیسنگ کے نظام میں سنگین خامیاں رہی ہیں، جبکہ پینے کے پانی کے منصوبوں میں 100 ارب روپے اور کوہستان اسکینڈل میں 37 ارب روپے کے مالیاتی فراڈ سمیت شدید کرپشن دیکھنے کو ملی۔ انہوں نے عزم ظاہر کیا کہ صوبے کے عوام کے وسائل کا ایک ایک پیسہ ترقی پر خرچ ہوگا اور کرپشن کا بلاامتیاز خاتمہ کیا جائے گا۔ اس موقع پر انہوں نے سی ایف ٹی (Counter Terrorism Department) کی باقاعدہ تنظیمِ نو، سیف سٹی منصوبوں کو فوری مکمل کرنے اور صوبے میں گندم کی بلاتعطل فراہمی یقینی بنانے کی ہدایت بھی دی۔