اے آئی پر بڑھتا انحصار، برطانیہ کے بارکلے بینک کا 5 ہزار ملازمین فارغ کرنے کا اعلان

برطانیہ کے مشہور عالمی مالیاتی ادارے بارکلے بینک (Barclays Bank) نے اخراجات میں کمی اور مصنوعی ذہانت (AI) پر انحصار بڑھانے کی حکمت عملی کے تحت سال 2026 کے اختتام تک دنیا بھر سے 5 ہزار ملازمتیں ختم کرنے کا بڑا اعلان کر دیا ہے۔

بارکلے بینک کے جاری کردہ بیان کے مطابق یہ قدم ادارہ جاتی عمل کو آسان بنانے اور AI کے جدید استعمال سے پیداواری صلاحیت کو بڑھانے کے لیے اٹھایا گیا ہے۔ حیران کن طور پر یہ اعلان ایسے وقت میں سامنے آیا ہے جب مالی سال کی تیسری سہ ماہی کے دوران بینک کے منافع میں 13 فیصد اضافہ ریکارڈ کیا گیا۔ ختم کی جانے والی 60 فیصد ملازمتوں کا تعلق معاون (Support) شعبوں سے ہے، جہاں مصنوعی ذہانت کے انضمام نے روایتی ملازمین کی ضرورت کو کم کر دیا ہے۔

بینک کی انتظامیہ نے تصدیق کی ہے کہ اب تک 1,000 ملازمتیں ختم کی جا چکی ہیں، جبکہ بقایا 4,000 ملازمتیں رواں سال کے اختتام تک ختم کر دی جائیں گی۔ اس فیصلہ کن کٹوتی کے نتیجے میں بینک کی عالمی سطح پر مجموعی افرادی قوت میں 5 فیصد کمی واقع ہو جائے گی۔ واضح رہے کہ یہ اقدام بارکلے بینک کی اخراجات میں کمی کی جاری 3 سالہ مہم کا حتمی حصہ ہے۔