لاہور پولیس کا گودام پر چھاپہ، 6 ہزار پتنگیں، ڈوریں برآمد، 5 ملزم گرفتار

مسلم ٹاؤن پولیس نے اہم کارروائی کرتے ہوئے خطرناک خونی کھیل کی روک تھام کے لیے ہزاروں پتنگیں اور قاتل ڈوریں برآمد کر کے 5 ملزمان کو گرفتار کر لیا ہے۔

پولیس ترجمان کے مطابق خفیہ اطلاع ملنے پر شاہ دی کھوئی کے قریب ایک گودام پر چھاپہ مارا گیا۔ کارروائی کے دوران گودام میں موجود 5 ملزمان—عمر، سیف اللہ، حسن، فخر اور فہیم—کو موقع پر ہی گرفتار کر لیا گیا۔ تلاشی کے دوران ملزمان کے قبضے سے 6 ہزار پتنگیں اور 300 چرخیاں (قاتل ڈور) برآمد کی گئیں۔

پولیس کا کہنا ہے کہ ملزمان بغیر کسی اجازت نامے یا لائسنس کے یہ ممنوعہ سامان فروخت کرنے کے لیے گودام میں ذخیرہ کر رہے تھے۔ مسلم ٹاؤن پولیس نے پانچوں ملزمان کے خلاف پنجاب کائٹ فلائنگ ایکٹ کے تحت مقدمہ درج کر کے مزید قانونی کارروائی شروع کر دی ہے۔