آئیسکو کی نجکاری کیلئے 10 قومی و بین الاقوامی فریقین کی پری کوالیفکیشن کی منظوری

وفاقی نجکاری کمیشن بورڈ نے اسلام آباد الیکٹرک سپلائی کمپنی (IESCO) کی نجکاری کے لیے 10 قومی و بین الاقوامی کمپنیوں اور کنسورشیمز کی پری کوالیفکیشن کی باضابطہ منظوری دے دی ہے۔ پری کوالیفائی ہونے والے بولی دہندگان میں ترکیہ، سعودی عرب اور پاکستان کے معروف صنعتی و معاشی گروپس شامل ہیں۔

اہل قرار پانے والی غیر ملکی کمپنیوں میں ترکیہ کی تین اہم انرجی کمپنیاں—اکٹور الیکٹرک، جینویرا انرجی اور چنگیز انرجی شامل ہیں۔ جبکہ پاکستانی گروپس میں اینگرو انرجی، نوواٹیکس، سیفائر فائبرز، بیسٹ وے سیمنٹ، آرٹسٹک ملنرز، حب پاور (HUBCO) اور حسنات برادرز کنسٹرکشن کی قیادت میں قائم کنسورشیمز شامل ہیں۔ نجکاری کمیشن تمام 10 فریقین کو ورچوئل ڈیٹا روم (VDR) تک رسائی فراہم کرے گا تاکہ وہ کمپنی کے مالیاتی و انتظامی ڈھانچے کا تفصیلی جائزہ لے سکیں۔ واضح رہے کہ آئیسکو نجکاری پروگرام کے پہلے مرحلے (بیچ ون) کا حصہ ہے جس میں فیسکو (FESCO) اور گیپکو (GEPCO) بھی شامل ہیں۔

اس کے علاوہ نجکاری کمیشن بورڈ نے زرعی ترقیاتی بینک (ZTBL) کی نجکاری کے ٹرانزیکشن اسٹرکچر اور ری اسٹرکچرنگ پلان میں تبدیلیوں کی بھی منظوری دی، جس کے تحت نجکاری کے بعد بھی بینک کا بنیادی فوکس کسانوں کی مالی معاونت پر رہے گا۔ مزید برآں، اسٹیٹ لائف انشورنس کارپوریشن کی نجکاری کے لیے ‘ڈوئچے بینک’ کی قیادت میں قائم کنسورشیم کو بطور مالیاتی مشیر (Financial Advisor) مقرر کرنے کی منظوری دے دی گئی ہے