سعودیہ پاکستان ریئل سٹیٹ ایکسپو بزنس کمیونٹی کیلئے گیم چینجر ہے: آصف زرداری

صدرِ مملکت آصف علی زرداری نے کہا ہے کہ ‘سعودیہ پاکستان ریئل اسٹیٹ ایکسپو’ بزنس کمیونٹی کے لیے گیم چینجر اور مقامی و بین الاقوامی سرمایہ کاروں کے لیے ایک اہم پیش رفت اور سنگِ میل ثابت ہو گی۔

سعودیہ پاکستان ریئل اسٹیٹ ایکسپو کی تقریب سے خطاب کرتے ہوئے صدر مملکت نے کہا کہ اس نمائش کے انعقاد سے پاکستانی اور سعودی کمپنیوں کو مشترکہ منصوبوں پر کام کرنے کا بہترین پلیٹ فارم ملے گا اور دونوں ممالک کے مابین باہمی تجارت و مشترکہ کاروبار کے نئے راستے کھلیں گے۔

صدر آصف علی زرداری نے سعودی عرب کی دیرینہ حمایت کا اعتراف کرتے ہوئے کہا کہ برادر اسلامی ملک سعودی عرب نے ہمیشہ ہر مشکل وقت میں پاکستان کا بھرپور ساتھ دیا ہے۔ انہوں نے زور دیا کہ اب وقت آ گیا ہے کہ دونوں ممالک کے تاریخی برادرانہ تعلقات کو پائیدار معاشی شراکت داری اور سرمایہ کاری کے عملی مواقع میں تبدیل کیا جائے۔