نیکسورا سندھ ای سپورٹس چیمپئن شپ 2026 سیمی فائنل مرحلے میں داخل

حکومتِ سندھ کے زیرِ اہتمام منعقد کی جانے والی ملک کی بڑی ‘نیکسورا سندھ ای اسپورٹس چیمپئن شپ 2026’ کا میلہ کراچی میں سج گیا ہے، جو اب اپنے سیمی فائنل مرحلے میں داخل ہو چکی ہے۔ سیکرٹری کھیل سندھ منور علی مہیسر اور ڈائریکٹر کھیل اسد اسحاق نے چیمپئن شپ کے سیمی فائنل مقابلوں کا دورہ کیا اور PUBG، Tekken 8 اور FC 27 کے مختلف سیمی فائنل میچز کا جائزہ لیا۔ اس موقع پر سیکرٹری کھیل نے بتایا کہ سیمی فائنل مقابلے پیر تک جاری رہیں گے جس میں کراچی کے علاوہ اسلام آباد، لاہور، کوئٹہ، گجرات اور گلگت بلتستان سمیت ملک بھر کے دیگر شہروں سے آئے بہترین گیمرز ایکشن میں نظر آئیں گے۔

سیکرٹری کھیل سندھ کے مطابق اس تاریخی ای اسپورٹس ایونٹ میں ملک بھر سے 1,000 سے زائد ٹیموں نے حصہ لیا جو کہ نوجوانوں کے اس ڈیجیٹل کھیل میں بڑھتے ہوئے رجحان کا ثبوت ہے۔ انہوں نے بتایا کہ صوبائی وزیرِ کھیل سردار محمد بخش مہر کی خصوصی ہدایت پر سندھ حکومت نوجوان کھلاڑیوں کو جدید ڈیجیٹل اسپورٹس پلیٹ فارمز فراہم کر رہی ہے تاکہ وہ بین الاقوامی سطح پر ملک کا نام روشن کر سکیں۔