چین میں خاتون نے چھتری کی مدد سے بلی کی جان بچا لی

چین کے شہر لیوژو (گوانگشی خطے) میں ایک خاتون نے حیران کن اور بروقت ردِعمل کا مظاہرہ کرتے ہوئے بلندی سے نیچے گرنے والی ایک بلی کو کھلی چھتری کی مدد سے زمین پر سخت ٹکرانے سے بچا لیا، جس کی ویڈیو سوشل میڈیا پر وائرل ہو گئی ہے۔ اطلاعات کے مطابق خاتون باہر کھڑی تصویریں بنوا رہی تھیں کہ اچانک ایک بلی بلندی سے نیچے کی جانب گرنے لگی۔ خاتون نے ابتدائی طور پر اسے اپنے ہاتھوں سے پکڑنے کی کوشش کی، مگر کامیابی نہ ملنے پر اپنے ہاتھ میں موجود کھلی چھتری آگے کر دی۔

بلی درست چھتری کے اوپر آ گری، جس نے ایک سیفٹی نیٹ (محفوظ جال) کا کام کیا اور بلی کی جان بچ گئی۔ بتایا جا رہا ہے کہ یہ بلی ایک قریبی رہائشی کی پالتو تھی جو غلطی سے رات بھر گھر سے باہر رہ گئی تھی۔ سوشل میڈیا پر اس دلچسپ اور سبق آموز واقعے کی ویڈیو سامنے آنے کے بعد صارفین خاتون کی حاضر دماغی اور رحم دلی کی شدید تعریف کر رہے ہیں۔