ڈریپ کا دوا ساز کمپنیوں کو ریکارڈ درست کرنے کے لیے آخری موقع

اسلام آباد: ڈرگ ریگولیٹری اتھارٹی آف پاکستان (ڈریپ) نے دوا ساز کمپنیوں کو ‘eAPP’ سافٹ ویئر پر اپنی مصنوعات کے آن لائن ریکارڈ کی درستگی اور تصدیق کے لیے آخری موقع فراہم کر دیا ہے۔

ڈریپ کے مطابق eAPP پورٹل پر مصنوعات کی خودکار تصدیق اور اپ ڈیٹ کی باقاعدہ تاریخ ختم ہونے کے بعد آن لائن پروسیسنگ بند کر دی گئی ہے۔ اب دوا ساز کمپنیوں کو ریکارڈ میں کسی بھی قسم کی ترمیم یا تصحیح کے لیے ڈریپ کے ایم آئی ایس (MIS) ڈویژن سے براہِ راست رجوع کرنا ہوگا، جہاں درخواست کے ساتھ مطلوبہ ثبوت اور معاون دستاویزات جمع کروانا لازم ہوگا۔

ڈریپ کا ایم آئی ایس ڈویژن دستاویزات کی مکمل جانچ پڑتال اور تصدیق کے بعد 15 ستمبر تک ریکارڈ کی تصحیح کی درخواستوں پر عمل درآمد کرے گا۔ واضح رہے کہ ڈریپ نے ملک بھر میں جعلی، غیر معیاری اور غیر قانونی ادویات کی خرید و فروخت کی روک تھام اور شفافیت یقینی بنانے کے لیے eAPP سافٹ ویئر نظام متعارف کرایا تھا۔