ٹرمپ کی ایران سے جنگ جیتنے پر تیل کی قیمتوں میں بڑی کمی کی پیشگوئی

واشنگٹن: امریکی صدر ڈونلڈ ٹرمپ نے دعویٰ کیا ہے کہ ایران کے ساتھ جاری تنازع میں امریکی فتح کے بعد عالمی مارکیٹ میں خام تیل اور پٹرول کی قیمتوں میں فوری اور نمایاں کمی واقع ہو گی۔

اپنے سوشل میڈیا پلیٹ فارم ‘ٹروتھ سوشل’ پر جاری ایک بیان میں صدر ٹرمپ نے کہا کہ جنگ ختم ہوتے ہی تیل کی قیمتیں تیزی سے نیچے گریں گی، جس کے بعد امریکی صارفین کے لیے پٹرول ابتدائی طور پر 3 ڈالر فی گیلن اور بالآخر 2 ڈالر فی گیلن سے بھی کم سطح پر آ جائے گا۔ انہوں نے عزم کا اظہار کرتے ہوئے مزید کہا کہ امریکا کسی بھی صورت ایران کو جوہری ہتھیار حاصل نہیں کرنے دے گا اور یہ تمام اہداف جلد حاصل کر لیے جائیں گے۔

امریکی صدر کا یہ بیان ایسے وقت میں سامنے آیا ہے جب آبنائے ہرمز میں جاری عسکری کشیدگی اور تجارتی جہاز رانی پر حملوں کے باعث عالمی منڈی میں برینٹ خام تیل کی قیمت 98 ڈالر فی بیرل کے قریب پہنچ چکی ہے۔ معاشی تجزیہ کاروں کے مطابق پٹرولیم مصنوعات کی قیمتوں میں اتنی بڑی کمی کا انحصار جنگ کے فوری خاتمے، عالمی سپلائی چین کی بحالی اور تیل پیداوار کرنے والے ممالک کی پالیسیوں پر ہو گا۔