قائم مقام صدر یوسف رضا گیلانی نے سینیٹ موبائل ایپلی کیشن کا افتتاح کر دیا

اسلام آباد: قائم مقام صدرِ پاکستان سید یوسف رضا گیلانی نے سینیٹ کی باضابطہ موبائل ایپلی کیشن کا افتتاح کرتے ہوئے اسے پارلیمانی شفافیت، ادارہ جاتی کارکردگی اور ڈیجیٹل بااختیاری کی جانب ایک اہم اور تزویراتی پیش رفت قرار دیا ہے۔

افتتاحی تقریب سے بطور مہمانِ خصوص خطاب کرتے ہوئے قائم مقام صدر نے کہا کہ 1973ء میں سینیٹ کے قیام کے بعد سے یہ اقدام ڈیجیٹل سفر کے ایک نئے دور کا آغاز ہے، جو محض ایک موبائل ایپ نہیں بلکہ پارلیمانی کام کے جدید انداز کی جانب پیش رفت ہے۔ انہوں نے کہا کہ ماضی کا دستی نظام وقتی ضیاع کا باعث بنتا تھا، جبکہ ٹیکنالوجی اور ‘ای آفس’ نظام اپنانے سے وقت کی بچت اور کارکردگی میں اضافہ ہو رہا ہے۔ یہ ایپ ارکانِ سینیٹ، محققین اور عام شہریوں کو مستند ڈیجیٹل آرکائیوز اور پارلیمانی سرگرمیوں تک بروقت رسائی فراہم کرے گی۔

سید یوسف رضا گیلانی نے سینیٹ سیکرٹریٹ اور آئی ٹی ڈیپارٹمنٹ کی کوششوں کو سراہتے ہوئے تمام سینیٹرز پر زور دیا کہ وہ اپنی آئینی ذمہ داریوں کی ادائیگی اور عوام سے رابطے کے لیے اس نئ ٹیکنالوجی کا بھرپور فائدہ اٹھائیں۔ افتتاحی تقریب میں قائم مقام چیئرمین سینیٹ سیدال خان، وفاقی وزیرِ آئی ٹی شزہ فاطمہ اور اراکینِ سینیٹ نے شرکت کی۔