شہباز شریف سے ممتاز صنعت کاروں اور کاروباری شخصیات کے وفد کی ملاقات

اسلام آباد: وزیراعظم شہباز شریف سے ممتاز صنعت کاروں اور کاروباری شخصیات کے ایک اعلیٰ سطحی وفد نے ملاقات کی، جس میں ملکی معاشی صورتحال، برآمدات میں اضافے اور صنعتی شعبے کو درپیش چیلنجز پر تفصیل سے گفتگو کی گئی۔

وفد کا خیرمقدم کرتے ہوئے وزیراعظم نے کہا کہ حکومت نے بجٹ کی تیاری سے قبل بھی صنعت کاروں کے ساتھ تفصیلی مشاورت کی تھی اور درپیش تمام تر مشکل حالات کے باوجود تاجر برادری کی تجاویز کی روشنی میں بنیاد پرست معاشی اصلاحات نافذ کی گئی ہیں۔ انہوں نے بتایا کہ سخت انفورسمنٹ اقدامات کے ذریعے ایک سال کے دوران 800 ارب روپے کی تاریخی ریکوری ممکن بنائی گئی ہے۔

وزیراعظم شہباز شریف نے زور دیا کہ ملکی برآمدات میں اضافہ حکومت کی معاشی پالیسی کا بنیادی نقطہ ہے اور ایکسپورٹس بڑھانے کی راہ میں حائل تمام رکاوٹوں کو ترجیحی بنیادوں پر دور کیا جائے گا۔ اس موقع پر تاجر برادری اور صنعت کاروں نے وزیراعظم کا شکریہ ادا کرتے ہوئے مشاورتی عمل کے تسلسل کو معاشی استحکام کے لیے انتہائی سود مند قرار دیا۔