حوثیوں کے حملے قابلِ مذمت، پاکستان سعودیہ کی حمایت جاری رکھے گا: وزیراعظم

اسلام آباد: وزیراعظم شہباز شریف نے یمن کے حوثی گروپ انصار اللہ کی جانب سے سعودی عرب کے مختلف شہروں پر کیے گئے حالیہ ڈرون و میزائل حملوں کی شدید ترین الفاظ میں مذمت کرتے ہوئے مملکت کی سلامتی اور علاقائی سالمیت کے لیے پاکستان کی غیر متزلزل حمایت کا اعادہ کیا ہے۔

انصار اللہ کی جانب سے سعودی عرب کے شہروں ابہا، خمیس مشیط، نجران اور جازان میں شہری آبادیوں اور معاشی تنصیبات کو نشانہ بنایا گیا، جس کے نتیجے میں خواتین اور بچوں سمیت 73 افراد زخمی ہوئے۔ وزیراعظم نے ان حملوں کو بلاجواز قرار دیتے ہوئے کہا کہ بے گناہ شہریوں اور سویلین انفراسٹرکچر پر حملے نہ صرف بین الاقوامی قوانین کی کھلی ورزی ہیں بلکہ علاقائی امن و استحکام کے لیے بھی شدید خطرہ ہیں۔

وزیراعظم شہباز شریف نے خادم الحرمین الشریفین شاہ سلمان بن عبدالعزیز، ولی عہد شہزادہ محمد بن سلمان اور برادر سعودی عوام سے مکمل یکجہتی کا اظہار کیا۔ انہوں نے زخمی ہونے والوں کی جلد صحت یابی کی دعا کرتے ہوئے اس عزم کو دہرایا کہ پاکستان سعودی عرب کے امن، سلامتی، خودمختاری اور تحفظ کے لیے ہر ممکن سطح پر اپنے برادر ملک کے ساتھ کھڑا رہے گا۔