مردوں اور خواتین میں عمر بڑھنے کا عمل مختلف ہوتا ہے، تحقیق

بیجنگ: چائنیز اکیڈمی آف سائنسز، چائنا نیشنل سینٹر فار بایوانفارمیٹکس اور دیگر معتبر چینی طبی اداروں کی ایک مشترکہ بین الاقوامی تحقیق میں انکشاف ہوا ہے کہ مردوں اور خواتین کے جسم میں عمر بڑھنے (Aging) کا عمل مختلف ادوار اور رفتار کے ساتھ رونما ہوتا ہے۔

عالمی معتبر جریدے نیچر ایجنگ (Nature Aging) میں شائع ہونے والی اس جامع تحقیق میں 18 سے 98 سال کی عمر کے ایک لاکھ 4 ہزار سے زائد افراد کے طبی ڈیٹا، جن میں 172 عام لیبارٹری ٹیسٹ بشمول بلڈ شوگر، کولیسٹرول اور میٹابولک انڈیکیٹرز شامل تھے، کا جائزہ لے کر ایک الگ ’ایجنگ کلاک‘ تیار کیا گیا۔ تحقیق کے نتائج کے مطابق مردوں میں عمر بڑھنے اور میٹابولزم میں تبدیلیوں کا اہم ترین موڑ 35 سے 45 سال کی عمر کے درمیان آتا ہے جس دوران ٹرائی گلیسرائیڈز اور کولیسٹرول کی سطح تیزی سے بڑھتی ہے۔ اس کے برعکس، خواتین میں یہ نمایاں ترین تبدیلی 55 سے 65 سال کی عمر کے دوران (سنِ یاس کے مرحلے پر) سامنے آتی ہے۔

تحقیق سے یہ اہم پیش رفت بھی سامنے آئی کہ بلڈ گلوکوز، یورک ایسڈ اور مخصوص بائیومارکرز (CEA اور HE4) خلیوں کی عمر رسیدہ ساخت پر براہِ راست اثر انداز ہوتے ہیں، اور خوراک میں بہتری، بلڈ شوگر پر قابو یا میٹفارمن (Metformin) جیسی ادویات کی مدد سے میٹابولک دباؤ کم کر کے عمر بڑھنے کی رفتار کو سست یا بعض منفی اثرات کو واپس موڑا جا سکتا ہے۔