وزیراعظم آزادکشمیرکی فوڈ اتھارٹی کو کاغذی کارروائی کے بجائے عملی اقدامات کا حکم

مظفرآباد: وزیراعظم آزاد جموں و کشمیر چوہدری افتخار گیلانی نے آزاد کشمیر فوڈ اتھارٹی کو محض کاغذی کارروائی تک محدود رہنے کے بجائے فیلڈ میں عملی اقدامات کے ذریعے مکمل طور پر فعال بنانے کی سخت ہدایت کی ہے۔

محکمہ خوراک کے اعلیٰ سطحی جائزہ اجلاس کی صدارت کرتے ہوئے وزیراعظم افتخار گیلانی نے کہا کہ عوام کی صحت پر کوئی سمجھوتہ نہیں کیا جائے گا۔ انہوں نے تمام ڈسٹرکٹ افسران کو ہدایت کی کہ بازاروں، ہوٹلوں، ریسٹورنٹس، بیکریوں اور دودھ فروخت کرنے والے مراکز کی بلاامتیاز اور باقاعدگی سے تلاشی و مانیٹرنگ کی جائے۔ انہوں نے واضح کیا کہ ملاوٹ مافیا اور مضرِ صحت اشیائے خورونوش بیچنے والوں کے خلاف قانون کے مطابق کڑی کارروائی کی جائے۔

اجلاس کے دوران ڈائریکٹر جنرل فوڈ اتھارٹی عبدالحمید کیانی نے ادارے کی کارکردگی پر تفصیلات پیش کیں۔ وزیراعظم نے ہدایت کی کہ فوڈ سیفٹی کے نظام کو جدید خطوط پر استوار کرنے کے لیے پنجاب فوڈ اتھارٹی کی تکنیکی معاونت اور تجربے سے فائدہ اٹھایا جائے۔ تاہم انہوں نے تاکید کی کہ تمام قانونی کارروائیاں ضابطے کے تحت کی جائیں اور کسی بھی دکاندار یا تاجر کے ساتھ بلاجواز زیادتی نہ ہو۔