27 ستمبر احتجاج کیس پر اسلام آباد ہائیکورٹ کا لارجر بینچ بنانے کا فیصلہ

اسلام آباد: اسلام آباد ہائیکورٹ نے پاکستان تحریک انصاف (پی ٹی آئی) کے 27 ستمبر کو متوقع احتجاج اور لانگ مارچ کو روکنے کے لیے دائر کی گئی درخواست پر اہم سماعت کرتے ہوئے معاملے کی نزاکت کے پیشِ نظر لارجر بینچ تشکیل دینے کا فیصلہ کیا ہے۔

چیف جسٹس اسلام آباد ہائیکورٹ جسٹس سرفراز ڈوگر نے مقامی تاجر وقاص احمد کی درخواست پر سماعت کی۔ دورانِ سماعت درخواست گزار کے وکیل نے موقف اختیار کیا کہ زیرِ التوا عدالتی مقدمات پر سڑکوں پر احتجاج اور لانگ مارچ کے ذریعے ریاستی اداروں و عدالتوں پر دباؤ ڈالنے کی کوشش کی جا رہی ہے۔ انہوں نے وزیراعلیٰ خیبر پختونخوا کے بیانات اور نومبر 2024 کے احتجاج کا حوالہ دیتے ہوئے کہا کہ ماضی کے مظاہروں میں رینجرز اہلکار جاں بحق اور تاجروں کا کروڑوں روپے کا مالی نقصان ہوا تھا، جبکہ احتجاج کے لیے سرکاری مشینری کے استعمال کا بھی خدشہ ہے۔

عدالت نے دلائل سننے کے بعد معاملے کی حساسیت اور قانون و آئین کے نقطہٴ نظر کو سامنے رکھتے ہوئے اٹارنی جنرل آف پاکستان کو نوٹس جاری کر دیا۔ علاوه ازیں، ہائیکورٹ نے چاروں صوبوں کے آئی جیز (انسپکٹر جنرلز آف پولیس) اور ایڈووکیٹ جنرلز کو بھی ذاتی حیثیت میں طلب کرتے ہوئے کیس کی مزید سماعت 10 ستمبر تک ملتوی کر دی۔