یادداشت کی کمزوری توقع سے پہلے شروع ہو جاتی ہے: تحقیق

نیویارک: یادداشت میں کمی اور بھولنے کے عارضے کو عموماً بڑھاپے سے منسوب کیا جاتا ہے، تاہم امریکہ کی بِنگہیمٹن یونیورسٹی (Binghamton University) کی ایک نئی سائنسی تحقیق نے انکشاف کیا ہے کہ یادداشت سے متعلق دماغی تبدیلیاں درمیانی عمر (Middle Age) ہی میں شروع ہو جاتی ہیں۔

بنگہیمٹن یونیورسٹی کے محققین نے 18 سے 74 سال کی عمر کے تقریباً 60 افراد پر ایک مفصل تجربہ کیا، جس کے دوران شرکاء کو مختلف چہروں کے ساتھ اشیاء اور مناظر دکھائے گئے اور ان کی یادداشت کے باقاعدہ ٹیسٹ لیے گئے۔ اس عمل کے دوران ایم آر آئی (MRI) اسکینز کے ذریعے دماغ کے اہم حصے ‘ہِپو کیمپس’ (Hippocampus) کی نیورولوجیکل سرگرمیوں کو ریکارڈ کیا گیا۔ محققین کے مطابق ہِپو کیمپس نئی یادداشتیں بنانے، معلومات کو محفوظ کرنے اور پرانی یادوں سے رابطہ استوار کرنے میں بنیادی کردار ادا کرتا ہے۔

تحقیق کے نتائج سے ظاہر ہوا کہ ہِپو کیمپس کی فعال صلاحیت میں کمی صرف انتہائی بڑھاپے کا مرحلہ نہیں بلکہ درمیانی عمر کے دوران ہی نمایاں ہونا شروع ہو جاتی ہے۔ تحقیق کے شریک مصنف آئن میک ڈونو (Ian McDonough) کے مطابق درمیانی عمر انسانی یادداشت کے تحفظ اور دماغی صحت کے لحاظ سے ایک انتہائی حساس اور اہم مرحلہ ہے، جسے ماضی میں کی جانے والی اکثر طبی تحقیقات میں نظر انداز کیا جاتا رہا ہے۔ ماہرین نے تجویز دیا ہے کہ درمیانی عمر سے ہی دماغی مشقوں اور صحت مند طرزِ زندگی کو اپنا کر یادداشت کی اس تنزلی کو سست کیا جا سکتا ہے۔