’پٹھان ہوں، گولی مارنی ہے تو مار دو‘، شاہ رخ خان کا انڈر ورلڈ ڈونز کو جواب

ممبئی: بالی ووڈ کے معروف ہدایت کار و فلمساز سنجے گپتا نے 1990ء کی دہائی میں بھارتی فلم انڈسٹری پر ممبئی انڈر ورلڈ کے گہرے اثر و رسوخ اور خوفناک ماحول کے بارے میں بات کرتے ہوئے سپر اسٹار شاہ رخ خان سے متعلق سنسنی خیز انکشافات کیے ہیں۔

ایک حالیہ انٹرویو میں سنجے گپتا نے بتایا کہ وہ 90 کی دہائی کے اس دور کے عینی شاہد ہیں جب ممبئی میں مافیا اور انڈر ورلڈ کا خوف عروج پر تھا، اور اداکاروں، ہدایت کاروں سے لے کر پروڈیوسرز تک کو مخصوص فلمیں سائن کرنے یا بھتہ دینے کے لیے مجبور کیا جاتا تھا۔ گینگسٹرز اکثر فلموں کے سیٹ پر پہنچ کر شوٹنگ کا نظارہ کرتے تھے اور فنکاروں پر دباؤ ڈالتے تھے۔ تاہم اس خطرناک اور کشیدہ ماحول میں شاہ رخ خان ان چند گنتی کی شخصیات میں شامل تھے جنہوں نے انڈر ورلڈ کی دھمکیوں کے سامنے تسلیم ہونے سے صاف انکار کر دیا تھا۔

فلمساز کے مطابق جب مافیا کی جانب سے شاہ رخ خان کو دھمکی دی گئی اور اپنی مرضی کے شوز یا فلمیں کرنے کے لیے دباؤ ڈالا گیا، تو اداکار نے انتہائی جرات مندانہ اور دوٹوک موقف اختیار کیا۔ سنجے گپتا کے مطابق شاہ رخ خان نے مبینہ طور پر گینگسٹرز کو جواب دیتے ہوئے کہا تھا کہ “میں پٹھان ہوں، اگر گولی مارنی ہے تو مار دو، میں تم سے ہرگز نہیں ڈرتا اور نہ ہی تمہارے کہنے پر کوئی کام کروں گا۔”