راولپنڈی: سابق وزیرِ اعظم راجہ پرویز اشرف کے گھر چوری

راولپنڈی میں تھانہ جاتلی کی حدود ڈھوک امب میں سابق وزیرِ اعظم راجہ پرویز اشرف کی رہائش گاہ پر چوری کی واردات پیش آئی ہے، جہاں سے چور لاکھوں روپے مالیت کا سامان چرا کر فرار ہو گئے۔

واقعے کا مقدمہ سابق وزیراعظم کے پرسنل سیکریٹری طیب فضل کی مدعیت میں تھانہ جاتلی میں درج کر لیا گیا ہے۔ ایف آئی آر کے متن کے مطابق چور رہائش گاہ سے 3 اے سی، 2 دروازے، 2 کھڑکیاں، قالین، کراکری، ڈیکوریشن پیسز اور گھاس کاٹنے والی مشین سمیت دیگر سامان سمیٹ کر لے گئے۔ چوری شدہ سامان کی مجموعی مالیت کا تخمینہ تقریباً 2 لاکھ 70 ہزار روپے لگایا گیا ہے۔

پولیس کا کہنا ہے کہ رہائش گاہ کے مختلف حصوں کے تالے ٹوٹے ہوئے پائے گئے ہیں جبکہ وہاں تعینات گھریلو ملازم پراسرار طور پر غائب ہے۔ ڈیوٹی پر موجود پولیس اہلکاروں کے مطابق ملازم گزشتہ رات سے غائب ہے اور اس کا موبائل فون بھی بند آ رہا ہے۔ پولیس نے مقدمہ درج کر کے فرار ملازم کی تلاش اور چوری کی تحقیقات شروع کر دی ہیں۔