خیبرپختونخوا میں سرکاری فنڈز کے اجرا کا طریقہ کار سخت کرنے کا فیصلہ

خیبر پختونخوا حکومت نے مالیاتی شفافیت اور نظم و ضبط کو یقینی بنانے کے لیے سرکاری فنڈز کے اجرا کا طریقہ کار مزید سخت کرنے کا فیصلہ کیا ہے۔

محکمہ خزانہ خیبر پختونخوا کی جانب سے جاری کردہ نئے ضابطہ کار کے تحت مجاز اتھارٹی (Competent Authority) کی پیشگی منظوری کے بغیر ایس اے پی (SAP) سسٹم میں فنڈز کے اندراج پر مکمل پابندی عائد کر دی گئی ہے۔ جاری کردہ دستاویزات کے مطابق سالانہ ترقیاتی پروگرام (ADP) اور پبلک سیکٹر ڈیولپمنٹ پروگرام (PSDP) کے تحت فنڈز کے اجرا کے لیے مقررہ فارمیٹس کی پابندی لازمی ہوگی، جبکہ فنڈز کے اجرا اور اخراجات کی روزانہ بنیادوں پر نگرانی کی جائے گی۔

محکمہ خزانہ نے واضح ہدایت کی ہے کہ فوری نوعیت کے فنڈز جاری کرنے کے لیے بھی سیکرٹری خزانہ یا متعلقہ مجاز افسر سے پیشگی اجازت لینا ضروری ہوگا، اور منظوری کی تاریخ کو ہی سیپ سسٹم میں فنڈز درج کرنا ہوں گے۔ فنڈز کے اجرا میں بلاوجہ تاخیر، غفلت یا مقررہ قواعد و ضوابط کی خلاف ورزی کرنے والے افسران اور اہلکاروں کے خلاف سخت انضباطی کارروائی عمل میں لائی جائے گی۔