وزیراعظم شہباز شریف کا دورۂ روس متوقع، صدر پوتن سے ملاقات ہوگی

وزیراعظم محمد شہباز شریف کا رواں برس 30 نومبر سے روس کا چار روزہ سرکاری دورہ متوقع ہے، جس کے دوران وہ روسی صدر ولادیمیر پوتن سے اعلیٰ سطح کی ملاقات کریں گے۔ سفارتی ذرائع کے مطابق مجوزہ دورے کا مقصد دونوں ممالک کے درمیان سیاسی، سفارتی، تجارتی، اقتصادی اور توانائی کے شعبوں میں تعاون کو مزید فروغ دینا ہے۔ مذاکرات میں پاکستان اسٹیل ملز کی بحالی، تیل و گیس کی فراہمی، زراعت، بینکنگ اور تجارتی ادائیگیوں کے نظام پر خصوصی توجہ دی جائے گی، جبکہ دورے کے موقع پر پاکستان روس بزنس فورم کا انعقاد بھی متوقع ہے جس میں دونوں ممالک کے کاروباری اداروں کے درمیان براہ راست (B2B) ملاقاتیں ہوں گی۔ اس کے علاوہ وزیراعظم کے دورے میں افغانستان کی صورتحال سمیت علاقائی سلامتی اور سینٹ پیٹرزبرگ کا دورہ بھی زیر غور ہے۔ دورے کی حتمی تاریخوں اور ایجنڈے کا باضابطہ اعلان تاحال باقی ہے۔