بھارت کی ہندوتوا پالیسی پر مبنی سیاست خطے میں بدامنی کا باعث ہے: مشیر نیشنل کمانڈ اتھارٹی

پاکستان کی نیشنل کمانڈ اتھارٹی کے مشیر لیفٹیننٹ جنرل (ر) مظہر جمیل نے لندن میں انسٹی ٹیوٹ آف انٹرنیشنل سٹریٹجک سٹڈیز کے زیرِ اہتمام سیمینار سے خطاب کرتے ہوئے کہا ہے کہ بھارت کی ہندوتوا پالیسی اور بالادستی کی سوچ جنوبی ایشیا میں شدید بدامنی اور عدم استحکام کا باعث ہے۔ انہوں نے بھارتی عسکری پیش رفت اور دوہری صلاحیت کے حامل ہتھیاروں کو خطے کے سٹریٹجک توازن کے لیے خطرہ قرار دیتے ہوئے بھارت کے ’جوہری ہتھیار پہلے استعمال نہ کرنے‘ کے دعوے پر سوالات اٹھائے۔ انہوں نے یاد دلایا کہ مئی 2025 کے بحران کے دوران بھارتی جارحیت نے خطے کو جوہری تباہی کے دہانے پر پہنچا دیا تھا، جس پر پاکستان نے مؤثر جواب دینے کے بعد ذمے دارانہ رویہ اپنایا۔ انہوں نے واضح کیا کہ پاکستان کا فل سپیکٹرم ڈیٹرنس سٹریٹجک توازن برقرار رکھنے کا ستون ہے اور بھارت کو پائیدار امن کے لیے مسئلہ کشمیر کا اقوامِ متحدہ کی قراردادوں کے مطابق حل اور سیاسی مکالمہ اپنانا ہوگا۔