بچوں میں ایچ آئی وی پھیلنے پر وفاقی سطح کی جے آئی ٹی بنانے کا مطالبہ

کراچی کے ولیکا ہسپتال میں مبینہ طبی غفلت کے باعث بچوں میں خطرناک وائرس ایچ آئی وی (HIV) پھیلنے کے سنگین معاملے پر متاثرہ بچوں کے وکیل ایڈووکیٹ طارق منصور نے وفاقی حکومت سے فوری اور اعلیٰ سطحی مشترکہ تحقیقاتی ٹیم (JIT) تشکیل دینے کا مطالبہ کیا ہے۔

متاثرہ بچوں کا مقدمہ لڑنے والے وکیل طارق منصور نے الزام عائد کیا ہے کہ سندھ حکومت اس حساس کیس کو دبانے کی کوشش کر رہی ہے۔ انہوں نے انکشاف کیا کہ ولیکا ہسپتال میں مبینہ طبی غفلت کی وجہ سے 169 سے زائد بچے ایچ آئی وی کا شکار ہو چکے ہیں، جبکہ متاثرہ بچوں کی کل تعداد 200 کے قریب پہنچنے کا شدید خدشہ ہے۔ وکیل کے مطابق ہسپتال انتظامیہ اور متعلقہ عملے کی غفلت کے باعث اب تک 9 متاثرہ بچے جاں بحق بھی ہو چکے ہیں۔

ایڈووکیٹ طارق منصور نے مزید کہا کہ سندھ حکومت کی جانب سے قائم کردہ تحقیقاتی کمیٹی کی رپورٹ تاحال پیش نہیں کی گئی اور نہ ہی اس دل دہلا دینے والے واقعے کا مقدمہ (FIR) درج ہوا ہے۔ انہوں نے وزیراعظم سے اپیل کی کہ پاکستان کمیشن آف انکوائری ایکٹ کی دفعہ 3 کے تحت وفاقی سطح پر جے آئی ٹی تشکیل دی جائے اور عوام سے ‘جسٹس فار ولیکا ہسپتال’ مہم چلانے کی درخواست کی۔