آئی ٹی کے شعبے میں 40 ارب ڈالر کے مواقع موجود ہیں: حافظ نعیم الرحمان

امیر جماعت اسلامی پاکستان حافظ نعیم الرحمان نے کہا ہے کہ ملک میں آئی ٹی کے شعبے میں 30 سے 40 ارب ڈالر کی برآمدات کے مواقع موجود ہیں اور نوجوانوں کو مواقع فراہم کیے جائیں تو وہ ملک کی تقدیر بدل سکتے ہیں۔ پاکستان کے سب سے بڑے اے آئی ہیکاتھون 2026ء کے گرینڈ فائنل کی اختتامی تقریب سے خطاب کرتے ہوئے انہوں نے بتایا کہ الخدمت فاؤنڈیشن کا ’بنو قابل‘ پروگرام امید کی نئی کرن بن کر ابھرا ہے جس کے تحت 16 لاکھ سے زائد بچے مفت آئی ٹی تعلیم حاصل کر رہے ہیں۔ حافظ نعیم الرحمان نے علی بابا کلاؤڈز کے تعاون کا شکریہ ادا کرتے ہوئے واضح کیا کہ حکومت کو ٹیکس وصولی کے بعد ہر بچے کو معیاری تعلیم فراہم کرنی چاہیے کیونکہ تعلیم خیرات نہیں بلکہ بنیادی حق ہے۔ انہوں نے ٹیکنالوجی کے مثبت استعمال کی ضرورت پر زور دیتے ہوئے کامیاب پراجیکٹس تیار کرنے والے نوجوانوں میں انعامات بھی تقسیم کیے۔