اے سی سی ویمنز ایشیا کپ ٹرافی کی رونمائی کردی گئی

دبئی میں منعقدہ ایک شاندار تقریب میں ویمنز ایشیا کپ ٹی ٹوئنٹی کی ٹرافی کی باضابطہ رونمائی کر دی گئی ہے، جس میں ٹورنامنٹ میں حصہ لینے والی تمام 8 ٹیموں کی کپتانوں نے شرکت کی۔ اس ایونٹ میں پاکستان، بھارت، بنگلادیش، سری لنکا، تھائی لینڈ، انڈونیشیا، ہانگ کانگ اور میزبان متحدہ عرب امارات کی ٹیمیں مدِمقابل ہوں گی اور تمام 15 میچز دبئی انٹرنیشنل اسٹیڈیم میں کھیلے جائیں گے۔ ایونٹ کا باقاعدہ آغاز کل تھائی لینڈ اور ہانگ کانگ کے میچ سے ہوگا، جبکہ قومی ویمن ٹیم اپنا پہلا میچ یکم ستمبر کو تھائی لینڈ کے خلاف کھیلے گی۔ روایتی حریف پاکستان اور بھارت کے درمیان اہم ٹکراؤ 5 ستمبر کو ہوگا، جس کے بعد سیمی فائنلز 10 اور 11 ستمبر کو جبکہ فائنل معرکہ 13 ستمبر کو دبئی میں سجایا جائے گا۔