ایگزیوس کا ایران کیخلاف فوجی آپریشن پر ٹرمپ اور نیتن یاہو میں بات چیت کا دعویٰ

امریکی نیوز ویب سائٹ ‘ایگزیوس’ (Axios) نے دعویٰ کیا ہے کہ سابق و موجودہ سیاسی صف بندی کے تناظر میں امریکی صدر ڈونلڈ ٹرمپ اور اسرائیلی وزیراعظم بن یامین نیتن یاہو کے درمیان ایران کے خلاف ایک بڑے عسکری آپریشن کے امکانات پر تفصیلی تبادلہ خیال ہوا ہے، جس میں ایران کے اہم فوجی اور جوہری اہداف کو نشانہ بنانا شامل تھا۔

ایگزیوس کی رپورٹ کے مطابق اسرائیلی وزیراعظم نیتن یاہو نے ایران کے جوہری پروگرام سے متعلق تازہ ترین اسرائیلی انٹیلی جنس معلومات اور خدشات سے امریکی صدر کو آگاہ کیا، جس میں بالخصوص ایران کی ممکنہ اعلیٰ درجے کی یورینیم افزودگی کی زیرِ زمین تنصیب ‘پک ایکس ماؤنٹین’ (Pickaxe Mountain) کا ذکر کیا گیا۔ رپورٹ میں مزید بتایا گیا کہ امریکی وزیرِ دفاع پیٹ ہیگسیتھ (Pete Hegseth) اور امریکی سینٹرل کمانڈ (CENTCOM) کے بعض اعلیٰ حکام ایران پر دوبارہ حملوں کے حامی ہیں، جبکہ صدر ٹرمپ کے کئی دیگر مشیر فی الوقت ایران پر سخت ترین معاشی پابندیاں جاری رکھنے کو ترجیح دے رہے ہیں۔ رپورٹ کے مطابق اسرائیلی فوج کے سربراہ ایال زمیر اور امریکی جوائنٹ چیفس آف اسٹاف کے چیئرمین ڈین کین کے درمیان بھی اس حوالے سے مشاورت ہوئی ہے۔

تاہم، دوسری جانب وائٹ ہاؤس نے ایگزیوس کی اس رپورٹ کی باضابطہ تردید کر دی ہے۔ وائٹ ہاؤس ترجمان کا کہنا ہے کہ صدر ڈونلڈ ٹرمپ پہلے ہی واضح کر چکے ہیں کہ وہ وسط مدتی انتخابات (Midterm Elections) سے قبل ایران پر کسی قسم کے نئے ملٹری حملے کے حامی نہیں ہیں اور امریکی انتظامیہ کا مؤقف اس حوالے سے بالکل واضح ہے۔