نیشنل چیمپئنز کپ کے تمام میچز میں شائقین کا داخلہ مفت رکھنے کا اعلان

پاکستان کرکٹ بورڈ (پی سی بی) نے 11 سے 18 اگست تک ملتان کرکٹ اسٹیڈیم میں کھیلے جانے والے نیشنل چیمپئنز کپ کے تمام میچز کے لیے شائقینِ کرکٹ کا داخلہ مفت رکھنے کا اعلان کیا ہے۔ پی سی بی کے مطابق ٹورنامنٹ کے تمام ساتوں میچز ڈے نائٹ ہوں گے جو دوپہر 3 بجے شروع ہوں گے۔ یہ ٹورنامنٹ سنگل لیگ راؤنڈ رابن کی بنیاد پر کھیلا جائے گا، جس میں پاکستان گرینز، پاکستان وائٹس، پاکستان بلوز اور پاکستان گولڈ کی چار ٹیمیں حصہ لے رہی ہیں اور ٹاپ دو ٹیموں کے درمیان فائنل معرکہ ہوگا۔

ٹورنامنٹ میں پاکستان گولڈ کی قیادت شاہین شاہ آفریدی، پاکستان گرینز کی کپتانی شاداب خان، پاکستان وائٹس کی قیادت صائم ایوب اور پاکستان بلوز کی کپتانی صاحبزادہ فرحان کریں گے۔ پی سی بی نے اس ایونٹ کے لیے 44 کھلاڑیوں پر مشتمل اسکواڈز اور 13 ریزرو کھلاڑیوں کے ناموں کا اعلان کیا ہے۔ نیشنل چیمپئنز کپ کے ساتھ ہی پاکستان کے 2026-27 کے ڈومیسٹک کرکٹ سیزن کا باقاعدہ آغاز ہو جائے گا، جسے 2027 کے آئی سی سی ون ڈے ورلڈ کپ کی تیاریوں کے حوالے سے انتہائی اہم قرار دیا جا رہا ہے۔