عمیر عارف نے ہانگ کانگ جونیئر اسکواش اوپن انڈر 17 کا ٹائٹل جیت لیا

پاکستان کے ابھرتے ہوئے نوجوان اسکواش کھلاڑی عمیر عارف نے شاندار کارکردگی کا مظاہرہ کرتے ہوئے ہانگ کانگ جونیئر اسکواش اوپن کا انڈر 17 ٹائٹل اپنے نام کر لیا ہے۔ سنسنی خیز فائنل معرکے میں عمیر عارف نے انگلینڈ کے لیوک میک برائیڈ کو سخت مقابلے کے بعد 3-2 سے شکست دے کر فتح حاصل کی۔ فائنل میں ان کی کامیابی کا اسکور 4-11، 11-6، 11-5، 9-11 اور 11-4 رہا۔

عمیر عارف اس سے قبل بھی ورلڈ جونیئر اور ایشین جونیئر اسکواش چیمپئن شپ میں بین الاقوامی سطح پر پاکستان کی نمائندگی کر چکے ہیں، جبکہ وہ بلقیس اینڈ عبدالرزاق داؤد فاؤنڈیشن کے فیلو بھی ہیں اور ان کی اس کامیابی پر کھیل کے حلقوں میں انہیں بھرپور سراہا جا رہا ہے۔