ٹک ٹاکر کاشف ضمیر بڑی مشکل میں پھنس گئے، ایک اور مقدمہ درج

معروف ٹک ٹاکر کاشف ضمیر کی مشکلات میں مزید اضافہ ہو گیا ہے اور ان کے خلاف لاہور کے تھانہ مزنگ میں ایک اور مقدمہ درج کر لیا گیا ہے۔ یہ ایف آئی آر سی ٹی ڈی (CTD) کراچی کے اہلکار دوست محمد خان کی مدعیت میں جان سے مارنے کی دھمکیاں دینے کی دفعات کے تحت درج کی گئی ہے۔ مدعی کا مؤقف ہے کہ سوشل میڈیا پر دوستی کے بعد ملزم کاشف ضمیر نے انہیں بیرونِ ملک بھجوانے کا جھانسہ دے کر 1 لاکھ 94 ہزار روپے ہڑپ کیے۔ ایف آئی آر کے مطابق، اس رقم کے فراڈ کا مقدمہ پہلے ہی تھانہ گلبرگ اور ایف آئی اے (FIA) میں زیرِ سماعت ہے۔ دوست محمد نے الزام لگایا ہے کہ اب ملزم کی جانب سے پرانا مقدمہ واپس لینے کے لیے شدید دباؤ ڈالا جا رہا ہے، جبکہ فون پر گالیاں دینے اور جان سے مارنے کی دھمکیاں بھی دی گئی ہیں، جس کی بنا پر یہ نیا مقدمہ درج کیا گیا ہے۔