دبئی کے عالمی فیشن ریمپ پر پاکستانی روایتی ملبوسات کے رنگ نمایاں

دبئی میں منعقد ہونے والے بین الاقوامی فیشن ویک اینڈ میں پاکستانی فیشن ڈیزائنرز نے اپنے روایتی اور جدید ملبوسات کے شاندار جلوے بکھیر کر دنیا بھر میں پاکستان کی بھرپور ثقافتی شناخت اور تخلیقی صلاحیتوں کو اجاگر کیا ہے۔

مختلف ممالک کے نامور ڈیزائنرز کی شرکت سے سجے اس فیشن شو میں پاکستانی شلوار قمیض، روایتی ملبوسات اور جدید کٹس کے حامل لباس ریمپ پر پیش کیے گئے، جنہیں شائقین کی جانب سے بے حد سراہا گیا۔ تقریب کا ایک اہم حصہ پاکستانی فیشن سے وابستہ ایک نئے پروجیکٹ کی پہلی بین الاقوامی رونمائی بھی تھی، جس کا مقصد ملکی فیشن انڈسٹری کو عالمی منڈی میں متعارف کرانا ہے۔ لاہور سے آن لائن فیشن کی دنیا میں قدم رکھنے والے پاکستانی ڈیزائنرز نے اپنی پہلی باقاعدہ بین الاقوامی نمائش کے لیے دبئی کا انتخاب کیا، جس کا بنیادی ہدف پاکستانی لباس کی منفرد ثقافتی اہمیت کو نمایاں کرنا اور ابھرتے ہوئے نئے ڈیزائنرز کے لیے عالمی فیشن کی دنیا میں ترقی کے نئے دروازے کھولنا ہے۔

دنیا نیوز سے خصوصی گفتگو کرتے ہوئے پاکستانی فیشن ڈیزائنر سلحین نے بتایا کہ ان کا دیرینہ خواب پاکستانی فیشن، بالخصوص شلوار قمیض اور روایتی ملبوسات کو عالمی سطح پر معتبر مقام دلانا ہے۔ ان کا کہنا تھا کہ پاکستانی ڈیزائنرز میں ٹیلنٹ اور تخلیقی صلاحیتوں کی کوئی کمی نہیں، بس ضرورت اس امر کی ہے کہ انہیں بین الاقوامی پلیٹ فارمز پر اپنی صلاحیتوں کا لوہا منوانے کے لیے مزید مواقع فراہم کیے جائیں۔ دبئی میں پاکستانی فیشن کی یہ شاندار پذیرائی دونوں ممالک کے درمیان ثقافتی تبادلے اور فیشن انڈسٹری کے بین الاقوامی روابط کو مضبوط بنانے کی جانب ایک اہم قدم ہے۔