ایران کا مستقبل سپریم لیڈر کی ہدایات کے مطابق ہوگا، صدر مسعود پزشکیان

ایرانی صدر مسعود پزشکیان نے واضح کیا ہے کہ خطے کی موجودہ پیچیدہ صورتحال سے کامیابی کے ساتھ نکلنے کے لیے ملک کے سپریم لیڈر آیت اللہ علی خامنہ ای کی ہدایات پر مکمل عمل درآمد کیا جائے گا، اور ایران کے مستقبل کا حتمی تعین بھی انہی رہنما اصولوں کے مطابق ہوگا۔

مسعود پزشکیان نے اپنے ایک بیان میں کہا کہ حکومت ملک کے تمام دستیاب وسائل کو سپریم لیڈر کی دی گئی ہدایات کی روشنی میں بروئے کار لائے گی تاکہ ملکی مفادات کا تحفظ کیا جا سکے۔ ایرانی صدر کا کہنا تھا کہ بیرونی دشمن اپنی اقتصادی پابندیوں، دباؤ اور کھوکھلی دھمکیوں کے ذریعے کبھی بھی غیور ایرانی عوام کے حوصلے پست نہیں کر سکتے، اور کسی بھی قسم کے دباؤ کے ذریعے ایران کو گھٹنے ٹیکنے یا ہتھیار ڈالنے پر ہرگز مجبور نہیں کیا جا سکتا۔